diwar-o-dar mein simTa ek lams kanpta hai

dīvār-o-dar meñ simTā ik lams kāñptā hai

bhūle se koī dastak de kar chalā gayā hai

sabr o shakeb baaqī taab o tavāñ salāmat

dil misl-e-ūd jal jal ḳhushbū bikhertā hai

ham ḳhaak ho chuke the apnī hī hiddatoñ meñ

miTTī hai raakh phir se paikar nayā banā hai

ik zaḳhm zaḳhm chehra TukḌoñ meñ haath aayā

aur ham samajh rahe the ā.īna juḌ gayā hai

sahrā-e-nīm-shab meñ be-ās retoñ par

din bhar ke kusht o ḳhuuñ kā maarā taḌap rahā hai

dahshat-zada zamīñ par vahshat bhare makāñ ye

is shahr-e-be-amāñ kā āḳhir koī ḳhudā hai

mil jaa.e ābloñ ko dād-e-musāfirat ab

ab dard-e-be-navā.ī kuchh had se bhī sivā hai

ham par to khul chukā bhī dar band har balā kā

kyā jāniye ajal ko ab intizār kyā hai

gul-chīniyoñ kā ham se 'bilqīs' haal pūchho

añgusht-e-ārzū meñ kāñTā utar gayā hai

diwar-o-dar mein simTa ek lams kanpta hai

bhule se koi dastak de kar chala gaya hai

sabr o shakeb baqi tab o tawan salamat

dil misl-e-ud jal jal KHushbu bikherta hai

hum KHak ho chuke the apni hi hiddaton mein

miTTi hai rakh phir se paikar naya bana hai

ek zaKHm zaKHm chehra TukDon mein hath aaya

aur hum samajh rahe the aaina juD gaya hai

sahra-e-nim-shab mein be-as reton par

din bhar ke kusht o KHun ka mara taDap raha hai

dahshat-zada zamin par wahshat bhare makan ye

is shahr-e-be-aman ka aaKHir koi KHuda hai

mil jae aablon ko dad-e-musafirat ab

ab dard-e-be-nawai kuchh had se bhi siwa hai

hum par to khul chuka bhi dar band har bala ka

kya jaaniye ajal ko ab intizar kya hai

gul-chiniyon ka hum se 'bilqis' haal puchho

angusht-e-arzu mein kanTa utar gaya hai