diwar phandne mein dekhoge kaam mera

dīvār phāñdne meñ dekhoge kaam merā

jab dham se aa kahūñgā sāhab salām merā

ham-sā.e aap ke maiñ letā huuñ ik havelī

is shahr meñ huā jo chande qayām merā

jo kuchh ki arz kī hai so kar dikhā.ūñgā maiñ

vaahī na baat samjho yūñhī kalām merā

achchhā mujhe satāo jitnā ki chāho maiñ bhī

samjhūñgā gar hai inshā-allāh naam merā

maiñ ġhash huā kahā juuñ saaqī ne mujh se hañs kar

ye sabz jaam terā aur surḳh jaam merā

pūchhā kisī ne mujh ko un se ki kaun hai ye

to bole hañs ke ye bhī hai ik ġhulām merā

mahshar kī tishnagī se kyā ḳhauf sayyad 'inshā'

kausar kā jaam degā mujh ko imaam merā

diwar phandne mein dekhoge kaam mera

jab dham se aa kahunga sahab salam mera

ham-sae aap ke main leta hun ek haweli

is shahr mein hua jo chande qayam mera

jo kuchh ki arz ki hai so kar dikhaunga main

wahi na baat samjho yunhi kalam mera

achchha mujhe satao jitna ki chaho main bhi

samjhunga gar hai insha-allah nam mera

main ghash hua kaha jun saqi ne mujh se hans kar

ye sabz jam tera aur surKH jam mera

puchha kisi ne mujh ko un se ki kaun hai ye

to bole hans ke ye bhi hai ek ghulam mera

mahshar ki tishnagi se kya KHauf sayyad 'insha'

kausar ka jam dega mujh ko imam mera