dikhae moajaze gar wo but-e-ayyar chuTki mein

dikhā.e mo.ajaze gar vo but-e-ayyār chuTkī meñ

to bole tā.ir-e-rañg-e-hinā har baar chuTkī meñ

hinā.ī fundaqeñ haiñ surḳh hai sofār chuTkī meñ

khilāyā hai mire qātil ne kyā gulzār chuTkī meñ

sitārī hai tumhārī yā ki naġhmoñ kā ḳhazāna hai

banī mizrāb bhī minqār-e-mūsīqār chuTkī meñ

mile gar ḳhāk-e-dar terī to hai iksīr kī chuTkī

abhī hotā hai achchhā ye dil-e-bīmār chuTkī meñ

liyā thā is zamīñ meñ imtihān-e-tab.a yāroñ se

kiye mauzūñ ye ham ne ai 'nasīm' ash.ār chuTkī meñ

dikhae moajaze gar wo but-e-ayyar chuTki mein

to bole tair-e-rang-e-hina har bar chuTki mein

hinai fundaqen hain surKH hai sofar chuTki mein

khilaya hai mere qatil ne kya gulzar chuTki mein

sitari hai tumhaari ya ki naghmon ka KHazana hai

bani mizrab bhi minqar-e-musiqar chuTki mein

mile gar KHak-e-dar teri to hai iksir ki chuTki

abhi hota hai achchha ye dil-e-bimar chuTki mein

liya tha is zamin mein imtihan-e-taba yaron se

kiye mauzun ye hum ne ai 'nasim' ashaar chuTki mein