dikhai ek se denge so karna sun ke alag

dikhā.ī ek se deñge so karnā sun ke alag

vo apnī dhun ke alag haiñ ham apnī dhun ke alag

ham aise log qabā.eñ haiñ baḌhte bachchoñ kī

ki jin ko rakh diyā jaatā hai pahle bun ke alag

isī liye to judā.ī bhī ḳhush-gavār rahī

bahut se ġham the hamāre alag aur un ke alag

ye nāsehoñ ko maiñ ab fārsī meñ samjhā.ūñ

'azāb kun ke alag hote haiñ makun ke alag

unhīñ ke saath maiñ kartā huuñ ab jugalbandī

kuchh ek log jo hote haiñ apnī dhun ke alag

guloñ ko rauñdne vaalo unheñ bhī yaad karo

jo log kar ga.e talvoñ se ḳhaar chun ke alag

dil ik parinda hai ḳhūrāk us kī ek sī rakh

vagarna bārhā māñgegā daane dunke alag

jo guzrī daane pe daana hī jāntā hai 'amit'

bhunā hai ho ke alag yā huā hai bhun ke alag

dikhai ek se denge so karna sun ke alag

wo apni dhun ke alag hain hum apni dhun ke alag

hum aise log qabaen hain baDhte bachchon ki

ki jin ko rakh diya jata hai pahle bun ke alag

isi liye to judai bhi KHush-gawar rahi

bahut se gham the hamare alag aur un ke alag

ye nasehon ko main ab farsi mein samjhaun

'azab kun ke alag hote hain makun ke alag

unhin ke sath main karta hun ab jugalbandi

kuchh ek log jo hote hain apni dhun ke alag

gulon ko raundne walo unhen bhi yaad karo

jo log kar gae talwon se KHar chun ke alag

dil ek parinda hai KHurak us ki ek si rakh

wagarna barha mangega dane dunke alag

jo guzri dane pe dana hi jaanta hai 'amit'

bhuna hai ho ke alag ya hua hai bhun ke alag