dikhate hain ada kuchh bhi to aafat aa hi jati hai

dikhāte haiñ adā kuchh bhī to aafat aa hī jaatī hai

sambhal kar laakh chalte haiñ qayāmat aa hī jaatī hai

mohabbat meñ haiñ sabr-o-shukr ke har-chand ham qaa.il

magar kuchh kuchh kabhī lab par shikāyat aa hī jaatī hai

jo sach pūchho to haiñ āshiq bhī pairav nāznīnoñ ke

badan meñ nā-tavānī se nazākat aa hī jaatī hai

majāz ik parda-e-idrāk hai to chashm-e-bīnā ko

kisī sūrat nazar shakl-e-haqīqat aa hī jaatī hai

nahīñ jazb-e-dil-e-āshiq se hai ma.ashūq ko chāra

agar bedard bhī ho to mohabbat aa hī jaatī hai

butān-e-sīm-tan ke vasl se ham faiz paate haiñ

vo aate haiñ to apne ghar meñ daulat aa hī jaatī hai

tire ash.ār-e-rañgīñ se bhalā farhat na ho 'ahqar'

ki in phūloñ se ḳhushbū-e-fasāhat aa hī jaatī hai

dikhate hain ada kuchh bhi to aafat aa hi jati hai

sambhal kar lakh chalte hain qayamat aa hi jati hai

mohabbat mein hain sabr-o-shukr ke har-chand hum qail

magar kuchh kuchh kabhi lab par shikayat aa hi jati hai

jo sach puchho to hain aashiq bhi pairaw nazninon ke

badan mein na-tawani se nazakat aa hi jati hai

majaz ek parda-e-idrak hai to chashm-e-bina ko

kisi surat nazar shakl-e-haqiqat aa hi jati hai

nahin jazb-e-dil-e-ashiq se hai mashuq ko chaara

agar bedard bhi ho to mohabbat aa hi jati hai

butan-e-sim-tan ke wasl se hum faiz pate hain

wo aate hain to apne ghar mein daulat aa hi jati hai

tere ashaar-e-rangin se bhala farhat na ho 'ahqar'

ki in phulon se KHushbu-e-fasahat aa hi jati hai