دکھاوے کی ہے جو ہر سو یہ غم خواری اداکاری

دکھاوے کی ہے جو ہر سو یہ غم خواری اداکاری

جہاں دیکھو دکھائی دے ریا کاری اداکاری

انا کے معنی و مفہوم سے واقف نہیں ہیں جو

سمجھتے ہیں ہمیشہ میری خودداری اداکاری

میں جس کے سامنے رونے نہیں دیتا ہوں آنکھوں کو

وہ کہتا ہے مری آنکھوں کی لاچاری اداکاری

اسے تو اپنے چہرے پر لگانے ہیں کئی چہرے

بھلا کیسے کرے سچ کی طرف داری اداکاری

خدا معصوم ہی سب بھیجتا ہے اپنی دنیا میں

کہاں ہم سیکھتے ہیں جا کے مکاری اداکاری

ترے اسٹیج پر مجھ کو بڑے کردار جینے ہیں

مرے مالک ابھی مجھ پر رہے طاری اداکاری

مری خوش قسمتی کہیے کہ سرکاری ملازم ہوں

میں ہر پل دیکھتا رہتا ہوں سرکاری اداکاری

میں شاہدؔ ہو کے کیسے جھوٹ سے رشتے نبھاؤں گا

سمجھتی ہے مرے اندر کی بیماری اداکاری