dikhawe ki hai jo har-su ye gham-KHwari adakari

dikhāve kī hai jo har-sū ye ġham-ḳhvārī adākārī

jahāñ dekho dikhā.ī de riyā-kārī adākārī

anā ke ma.anī-o-mafhūm se vāqif nahīñ haiñ jo

samajhte haiñ hamesha merī ḳhuddārī adākārī

maiñ jis ke sāmne rone nahīñ detā huuñ āñkhoñ ko

vo kahtā hai mirī āñkhoñ kī lāchārī adākārī

use to apne chehre par lagāne haiñ ka.ī chehre

bhalā kaise kare sach kī taraf-dārī adākārī

ḳhudā ma.asūm hī sab bhejtā hai apnī duniyā meñ

kahāñ ham sīkhte haiñ jā ke makkārī adākārī

tire stage par mujh ko baḌe kirdār jiine haiñ

mire mālik abhī mujh par rahe taarī adākārī

mirī ḳhush-qismatī kahiye ki sarkārī mulāzim huuñ

maiñ har pal dekhtā rahtā huuñ sarkārī adākārī

maiñ 'shāhid' ho ke kaise jhuuT se rishte nibhā.ūñgā

samajhtī hai mire andar kī bīmārī adākārī

dikhawe ki hai jo har-su ye gham-KHwari adakari

jahan dekho dikhai de riya-kari adakari

ana ke mani-o-mafhum se waqif nahin hain jo

samajhte hain hamesha meri KHuddari adakari

main jis ke samne rone nahin deta hun aankhon ko

wo kahta hai meri aankhon ki lachaari adakari

use to apne chehre par lagane hain kai chehre

bhala kaise kare sach ki taraf-dari adakari

KHuda masum hi sab bhejta hai apni duniya mein

kahan hum sikhte hain ja ke makkari adakari

tere stage par mujh ko baDe kirdar jine hain

mere malik abhi mujh par rahe tari adakari

meri KHush-qismati kahiye ki sarkari mulazim hun

main har pal dekhta rahta hun sarkari adakari

main 'shahid' ho ke kaise jhuT se rishte nibhaunga

samajhti hai mere andar ki bimari adakari