dil aaina-timsal ho gar soz-e-yaqin se

dil ā.ina-timsāl ho gar soz-e-yaqīñ se

sajdoñ kā ta'alluq rahe dar se na jabīñ se

ādāb-e-mohabbat meñ numā.ish nahīñ dāḳhil

sajdoñ ke nishāñ miT na ga.e lauh-e-jabīñ se

hastī ke maqāmāt hue ġhaib se raushan

hastī pe nazar kī jo kabhī uTh ke zamīñ se

maujoñ ne bulandī kī taraf ruḳh to kiyā hai

tāham haiñ bahut duur abhī māh-e-mubīñ se

dekhe to koī aag ke dariyā meñ utar kar

takmīl-e-mohabbat kā hai āġhāz yahīñ se

duniyā ko kahāñ mā’rifat-e-gardish-e-daurāñ

Takrā.eñge ye zarre kabhī 'arsh-e-barīñ se

har jalva nigāhoñ meñ taḌapne ko hai betāb

ye baat huī aa.ina ik gosha-nashīñ se

rakkhā hai qadam chaudhvīñ manzil meñ unhoñ ne

le aa.e koī shams-o-qamar charḳh-e-barīñ se

'bismil' maiñ unheñ dauḌ ke siine se lagā luuñ

ai kaash vo aate hue mil jaa.eñ kahīñ se

dil aaina-timsal ho gar soz-e-yaqin se

sajdon ka ta'alluq rahe dar se na jabin se

aadab-e-mohabbat mein numaish nahin daKHil

sajdon ke nishan miT na gae lauh-e-jabin se

hasti ke maqamat hue ghaib se raushan

hasti pe nazar ki jo kabhi uTh ke zamin se

maujon ne bulandi ki taraf ruKH to kiya hai

taham hain bahut dur abhi mah-e-mubin se

dekhe to koi aag ke dariya mein utar kar

takmil-e-mohabbat ka hai aaghaz yahin se

duniya ko kahan ma’rifat-e-gardish-e-dauran

Takraenge ye zarre kabhi 'arsh-e-barin se

har jalwa nigahon mein taDapne ko hai betab

ye baat hui aaina ek gosha-nashin se

rakkha hai qadam chaudhwin manzil mein unhon ne

le aae koi shams-o-qamar charKH-e-barin se

'bismil' main unhen dauD ke sine se laga lun

ai kash wo aate hue mil jaen kahin se