dil ab us shahr mein jaane ko machalta bhi nahin

dil ab us shahr meñ jaane ko machaltā bhī nahīñ

kyā zarūrī hai zarūrat se alag ho jaanā

ain-mumkin hai samajh tum ko na aa.uuñ is saal

tum yahī karnā ki ujlat se alag ho jaanā

ye kahīñ chhīn na le sabr kī daulat tum se

dil dhuāñ kartī qayāmat se alag ho jaanā

vo tumheñ bhuul ke pāgal bhī to ho saktā hai

dekh kar vaqt suhūlat se alag ho jaanā

merī taqdīr meñ bas ek hī dukh utrā hai

dil kā us yaar kī sañgat se alag ho jaanā

terā ġham hī to uḌaa.e liye phirtā hai mujhe

chāhe kaun aisī aziyyat se alag ho jaanā

adh-khile phuul se rakhnā na kabhī rabt koī

adh-bujhe rañg kī hālat se alag ho jaanā

ham to jaañ haar chale haiñ pa tum ai nik.hat-e-gul

chashm-e-qātil kī mashiyyat se alag ho jaanā

dil ab us shahr mein jaane ko machalta bhi nahin

kya zaruri hai zarurat se alag ho jaana

ain-mumkin hai samajh tum ko na aaun is sal

tum yahi karna ki ujlat se alag ho jaana

ye kahin chhin na le sabr ki daulat tum se

dil dhuan karti qayamat se alag ho jaana

wo tumhein bhul ke pagal bhi to ho sakta hai

dekh kar waqt suhulat se alag ho jaana

meri taqdir mein bas ek hi dukh utra hai

dil ka us yar ki sangat se alag ho jaana

tera gham hi to uDae liye phirta hai mujhe

chahe kaun aisi aziyyat se alag ho jaana

adh-khile phul se rakhna na kabhi rabt koi

adh-bujhe rang ki haalat se alag ho jaana

hum to jaan haar chale hain pa tum ai nikhat-e-gul

chashm-e-qatil ki mashiyyat se alag ho jaana