dil ajab gumbad ki jis mein ek kabutar bhi nahin

dil ajab gumbad ki jis meñ ik kabūtar bhī nahīñ

itnā vīrāñ to mazāroñ kā muqaddar bhī nahīñ

Dūbtī jaatī haiñ miTTī meñ badan kī kashtiyāñ

dekhne meñ ye zamīñ koī samundar bhī nahīñ

jitne hañgāme the sūkhī Tahniyoñ se jhaḌ ga.e

peḌ par phal bhī nahīñ āñgan meñ patthar bhī nahīñ

ḳhushk Tahnī par parinda hai ki pattā hai 'adīm'

āshiyāna bhī nahīñ jis kā koī par bhī nahīñ

jitnī pyārī haiñ mirī dhartī ko zanjīreñ 'adīm'

utnā pyārā to kisī dulhan ko zevar bhī nahīñ

dil ajab gumbad ki jis mein ek kabutar bhi nahin

itna viran to mazaron ka muqaddar bhi nahin

Dubti jati hain miTTi mein badan ki kashtiyan

dekhne mein ye zamin koi samundar bhi nahin

jitne hangame the sukhi Tahniyon se jhaD gae

peD par phal bhi nahin aangan mein patthar bhi nahin

KHushk Tahni par parinda hai ki patta hai 'adim'

aashiyana bhi nahin jis ka koi par bhi nahin

jitni pyari hain meri dharti ko zanjiren 'adim'

utna pyara to kisi dulhan ko zewar bhi nahin