دل اسیر غم دوراں ہے غزل کیا کہیے

دل اسیر غم دوراں ہے غزل کیا کہیے

زندگی سر بہ گریباں ہے غزل کیا کہیے

اب تو ہر نقش نمایاں ہے غزل کیا کہیے

دل چراغ تہ داماں ہے غزل کیا کہیے

چہرۂ شعلہ و شبنم پہ برستا ہے دھواں

برق کی زد میں گلستاں ہے غزل کیا کہیے

زلف شب رنگ کا افسانہ خوش آئند سہی

روبرو شام غریباں ہے غزل کیا کہیے

ذوق پر چھائی ہیں منہ بولتی زندہ غزلیں

ہم ہیں اور مجمع خوباں ہے غزل کیا کہیے

حال دل غیر نظر خیرہ پراگندہ دماغ

حشر کا دن شب ہجراں ہے غزل کیا کہیے

فرصت تذکرۂ کاکل و رخسار کہاں

جوہری دور میں انساں ہے غزل کیا کہیے

بوئے گل نالۂ دل دود چراغ محفل

بزم کی بزم پریشاں ہے غزل کیا کہیے

فیض سے جس کے چمن زار سخن تھا سیراب

خشک وہ چاہ زنخداں ہے غزل کیا کہیے

من کی دنیا پہ تو چھائے ہیں اندھیرے ہر سو

تن کی دنیا میں چراغاں ہے غزل کیا کہیے

بزم افکار کو رکھتی تھی جو روشن اے دوست

لو اسی شمع کی لرزاں ہے غزل کیا کہیے

آسماں سر پہ اٹھائے ہے زمیں کی شورش

ایک ہنگامۂ طوفاں ہے غزل کیا کہیے

خون مظلوم سے آلودہ ہے چپہ چپہ

ہر طرف گنج شہیداں ہے غزل کیا کہیے

پھول مرجھائے ہوئے نبض چمن افسردہ

رخصت فصل بہاراں ہے غزل کیا کہیے

ہر طرف امن کے نعروں سے فضا ہے معمور

ہر طرف جنگ کا ساماں ہے غزل کیا کہیے

غیر تو غیر ہیں اس دور سیہ بختی میں

اپنا سایہ بھی گریزاں ہے غزل کیا کہیے

اب تو سینے میں بجائے دل سوزاں فاروقؔ

ایک شعلہ سا فروزاں ہے غزل کیا کہیے