dil asir-e-gham-e-dauran hai ghazal kya kahiye

dil asīr-e-ġham-e-daurāñ hai ġhazal kyā kahiye

zindagī sar-ba-garebāñ hai ġhazal kyā kahiye

ab to har naqsh numāyāñ hai ġhazal kyā kahiye

dil charāġh-e-tah-e-dāmāñ hai ġhazal kyā kahiye

chehra-e-sho.ala-o-shabnam pe barastā hai dhuāñ

barq kī zad meñ gulistāñ hai ġhazal kyā kahiye

zulf-e-shab-rañg kā afsāna ḳhush-ā.ind sahī

rū-ba-rū shām-e-ġharībāñ hai ġhazal kyā kahiye

zauq par chhā.ī haiñ muñh boltī zinda ġhazleñ

ham haiñ aur majma.a-e-ḳhūbāñ hai ġhazal kyā kahiye

hāl-e-dil ġhair nazar ḳhīra parāganda dimāġh

hashr kā din shab-e-hijrāñ hai ġhazal kyā kahiye

fursat-e-tazkira-e-kākul-o-ruḳhsār kahāñ

jauharī daur meñ insāñ hai ġhazal kyā kahiye

bū-e-gul nāla-e-dil dūd-e-charāġh-e-mahfil

bazm kī bazm pareshāñ hai ġhazal kyā kahiye

faiz se jis ke chaman-zār-e-suḳhan thā sairāb

ḳhushk vo chāh-e-zanaḳhdāñ hai ġhazal kyā kahiye

man kī duniyā pe to chhā.e haiñ añdhere har sū

tan kī duniyā meñ charāġhāñ hai ġhazal kyā kahiye

bazm-e-afkār ko rakhtī thī jo raushan ai dost

lau usī sham.a kī larzāñ hai ġhazal kyā kahiye

āsmāñ sar pe uThā.e hai zamīñ kī shorish

ek hañgāma-e-tūfāñ hai ġhazal kyā kahiye

ḳhūn-e-mazlūm se ālūda hai chappa chappa

har taraf ganj-e-shahīdāñ hai ġhazal kyā kahiye

phuul murjhā.e hue nabz-e-chaman afsurda

ruḳhsat-e-fasl-e-bahārāñ hai ġhazal kyā kahiye

har taraf amn ke na.aroñ se fazā hai māmūr

har taraf jañg kā sāmāñ hai ġhazal kyā kahiye

ġhair to ġhair haiñ is daur-e-siyah-baḳhtī meñ

apnā saaya bhī gurezāñ hai ġhazal kyā kahiye

ab to siine meñ bajā.e dil-e-sozāñ 'fārūq'

ek sho.ala sā farozāñ hai ġhazal kyā kahiye

dil asir-e-gham-e-dauran hai ghazal kya kahiye

zindagi sar-ba-gareban hai ghazal kya kahiye

ab to har naqsh numayan hai ghazal kya kahiye

dil charagh-e-tah-e-daman hai ghazal kya kahiye

chehra-e-shoala-o-shabnam pe barasta hai dhuan

barq ki zad mein gulistan hai ghazal kya kahiye

zulf-e-shab-rang ka afsana KHush-aind sahi

ru-ba-ru sham-e-ghariban hai ghazal kya kahiye

zauq par chhai hain munh bolti zinda ghazlen

hum hain aur majma-e-KHuban hai ghazal kya kahiye

haal-e-dil ghair nazar KHira paraganda dimagh

hashr ka din shab-e-hijran hai ghazal kya kahiye

fursat-e-tazkira-e-kakul-o-ruKHsar kahan

jauhari daur mein insan hai ghazal kya kahiye

bu-e-gul nala-e-dil dud-e-charagh-e-mahfil

bazm ki bazm pareshan hai ghazal kya kahiye

faiz se jis ke chaman-zar-e-suKHan tha sairab

KHushk wo chah-e-zanaKHdan hai ghazal kya kahiye

man ki duniya pe to chhae hain andhere har su

tan ki duniya mein charaghan hai ghazal kya kahiye

bazm-e-afkar ko rakhti thi jo raushan ai dost

lau usi shama ki larzan hai ghazal kya kahiye

aasman sar pe uThae hai zamin ki shorish

ek hangama-e-tufan hai ghazal kya kahiye

KHun-e-mazlum se aaluda hai chappa chappa

har taraf ganj-e-shahidan hai ghazal kya kahiye

phul murjhae hue nabz-e-chaman afsurda

ruKHsat-e-fasl-e-bahaaran hai ghazal kya kahiye

har taraf amn ke naron se faza hai mamur

har taraf jang ka saman hai ghazal kya kahiye

ghair to ghair hain is daur-e-siyah-baKHti mein

apna saya bhi gurezan hai ghazal kya kahiye

ab to sine mein bajae dil-e-sozan 'faruq'

ek shoala sa farozan hai ghazal kya kahiye