dil badalne se na aflak badal jaane se

dil badalne se na aflāk badal jaane se

shahr badlā mirī poshāk badal jaane se

kis qadar ho ga.ī āsān hamārī mushkil

ek paimāna-e-idrāk badal jaane se

aaj bhī raqs hī karnā hai ishāroñ pe hameñ

fā.eda kuchh na huā chaak badal jaane se

rāsta ab bhī vahī hai mirī manzil bhī vahī

tez-rau maiñ huā pechāk badal jaane se

bhiiḌ baḌhne lagī hai mere bahī-ḳhvāhoñ kī

ik zarā sūrat-e-namnāk badal jaane se

niiñd aatī thī bahut farsh-e-zamīñ par mujh ko

ḳhvāb rūThe mirī imlāk badal jaane se

be-vatan maiñ huuñ magar ḳhush haiñ mire ghar vaale

itnā hāsil to huā ḳhaak badal jaane se

badlī badlī sī nazar aatī hai duniyā 'ālam'

bas mizāj-e-ḳhas-o-ḳhāshāk badal jaane se

dil badalne se na aflak badal jaane se

shahr badla meri poshak badal jaane se

kis qadar ho gai aasan hamari mushkil

ek paimana-e-idrak badal jaane se

aaj bhi raqs hi karna hai ishaaron pe hamein

faeda kuchh na hua chaak badal jaane se

rasta ab bhi wahi hai meri manzil bhi wahi

tez-rau main hua pechaak badal jaane se

bhiD baDhne lagi hai mere bahi-KHwahon ki

ek zara surat-e-namnak badal jaane se

nind aati thi bahut farsh-e-zamin par mujh ko

KHwab ruThe meri imlak badal jaane se

be-watan main hun magar KHush hain mere ghar wale

itna hasil to hua KHak badal jaane se

badli badli si nazar aati hai duniya 'alam'

bas mizaj-e-KHas-o-KHashak badal jaane se