dil bahalne ka jahan mein koi saman na hua

dil bahalne kā jahāñ meñ koī sāmāñ na huā

apnā hamdard kabhī ālam-e-imkāñ na huā

shikva-e-hijr na bhūle se bhī aayā lab par

rū-ba-rū un ke maiñ ḳhud-karda pashemāñ na huā

ham-nashīñ pūchh na hāl-e-dil-e-nākām-e-azal

yahī hasrat rahī puurā koī armāñ na huā

be-ḳhudī meñ ye hai aalam tire dīvānoñ kā

fasl-e-gul aa.ī magar chaak garebāñ na huā

koī kyā jaane ki kyā lutf ḳhalish hai hāsil

merā hī dil hai ki minnat-kash-e-darmāñ na huā

yuuñ to hamdard zamāna thā ba-zāhir lekin

kisī sūrat se ilāj-e-ġham-e-pinhāñ na huā

be-dhaḌak jaane kī himmat na huī mahshar meñ

muñh chhupāne ke liye dast-ba-dāmāñ na huā

dil bahaltā bhī to kis tarah bahaltā shab-e-ġham

sāz-o-sāmāñ na huā naġhma-ehirmāñ na huā

pursish-e-hāl pe āñkhoñ meñ bhar aa.e aañsū

aise majbūr hue zabt bhī āsāñ na huā

zarre zarre se ayaañ husn kī ra.anā.ī hai

vo hasīñ tū hai ki pardoñ meñ bhī pinhāñ na huā

maiñ thā mushtāq tire jalve kā ai māya-e-husn

rah ke parde meñ bhī to sho.ala-e-uryāñ na huā

chain se qaid ta.ayyun meñ basar kī ai 'shauq'

dil bhī jam.īyat-e-ḳhātir se pareshāñ na huā

dil bahalne ka jahan mein koi saman na hua

apna hamdard kabhi aalam-e-imkan na hua

shikwa-e-hijr na bhule se bhi aaya lab par

ru-ba-ru un ke main KHud-karda pasheman na hua

ham-nashin puchh na haal-e-dil-e-nakaam-e-azal

yahi hasrat rahi pura koi arman na hua

be-KHudi mein ye hai aalam tere diwanon ka

fasl-e-gul aai magar chaak gareban na hua

koi kya jaane ki kya lutf KHalish hai hasil

mera hi dil hai ki minnat-kash-e-darman na hua

yun to hamdard zamana tha ba-zahir lekin

kisi surat se ilaj-e-gham-e-pinhan na hua

be-dhaDak jaane ki himmat na hui mahshar mein

munh chhupane ke liye dast-ba-daman na hua

dil bahalta bhi to kis tarah bahalta shab-e-gham

saz-o-saman na hua naghma-ehirman na hua

pursish-e-haal pe aankhon mein bhar aae aansu

aise majbur hue zabt bhi aasan na hua

zarre zarre se ayan husn ki ranai hai

wo hasin tu hai ki pardon mein bhi pinhan na hua

main tha mushtaq tere jalwe ka ai maya-e-husn

rah ke parde mein bhi to shoala-e-uryan na hua

chain se qaid tayyun mein basar ki ai 'shauq'

dil bhi jamiyat-e-KHatir se pareshan na hua