دل بہلتا ہی نہیں ہے جب کسی تدبیر سے

دل بہلتا ہی نہیں ہے جب کسی تدبیر سے

حال دل کہتا ہوں اپنا میں تری تصویر سے

تیرگی چھائی ہوئی ہے اس قدر اب چار سو

جیسے روشن ہی نہ ہوگی زندگی تنویر سے

اپنے ہاتھوں سے بگاڑا میں نے جب تقدیر کو

پھر کروں کیوں کر شکایت کاتب تقدیر سے

دل میں پہلے ہی غم و آلام دنیا کم نہ تھے

اور گھائل ہو گیا تیرا نظر کے تیر سے

اب نہ رنگیں خواب مستقبل کے دکھلاؤ مجھے

خوب واقف ہوں میں ایسے خواب کی تعبیر سے

کچھ عجب عالم ہے دل کا جب سے تیرا خط پڑھا

تجھ کو کیا معلوم دل کتنا دکھا تحریر سے

صرف مایوسی کی دلدل ہے جدھر بھی دیکھیے

ہم کو یہ تحفہ ملا ہے حسن کی جاگیر سے