dil bahut be-tab tha un ko muqabil dekh kar

dil bahut be-tāb thā un ko muqābil dekh kar

haañ magar maiñ hosh meñ thā rang-e-mahfil dekh kar

kyā kahūñ mauj-e-havādis ke guzar jaane ke ba.ad

kyoñ uThā tūfāñ mirī āñkhoñ meñ sāhil dekh kar

sham’-e-dil raushan rakho jahd-o-amal kī raah meñ

varna zulmat luuT legī tum ko ġhāfil dekh kar

ab taġhāful kā gila bejā hai daur-e-hijr meñ

dil ko dete vaqt dete lā.iq-e-dil dekh kar

kyoñ mire chehre pe gard-e-ġham na ho ai ham-nafas

aa rahā huuñ āñdhiyāñ manzil-ba-manzil dekh kar

māh-e-kāmil kī haqīqat ho ga.ī ham par ayaañ

ham ne jab bhī un ko dekhā māh-e-kāmil dekh kar

dil bahut be-tab tha un ko muqabil dekh kar

han magar main hosh mein tha rang-e-mahfil dekh kar

kya kahun mauj-e-hawadis ke guzar jaane ke baad

kyon uTha tufan meri aankhon mein sahil dekh kar

sham’-e-dil raushan rakho jahd-o-amal ki rah mein

warna zulmat luT legi tum ko ghafil dekh kar

ab taghaful ka gila beja hai daur-e-hijr mein

dil ko dete waqt dete laiq-e-dil dekh kar

kyon mere chehre pe gard-e-gham na ho ai ham-nafas

aa raha hun aandhiyan manzil-ba-manzil dekh kar

mah-e-kaamil ki haqiqat ho gai hum par ayan

hum ne jab bhi un ko dekha mah-e-kaamil dekh kar