دل بہت بے تاب تھا ان کو مقابل دیکھ کر

دل بہت بے تاب تھا ان کو مقابل دیکھ کر

ہاں مگر میں ہوش میں تھا رنگ محفل دیکھ کر

کیا کہوں موج حوادث کے گزر جانے کے بعد

کیوں اٹھا طوفاں مری آنکھوں میں ساحل دیکھ کر

شمع دل روشن رکھو جہد‌ و عمل کی راہ میں

ورنہ ظلمت لوٹ لے گی تم کو غافل دیکھ کر

اب تغافل کا گلہ بے جا ہے دور ہجر میں

دل کو دیتے وقت دیتے لائق دل دیکھ کر

کیوں مرے چہرے پہ گرد غم نہ ہو اے ہم نفس

آ رہا ہوں آندھیاں منزل بہ منزل دیکھ کر

ماہ کامل کی حقیقت ہو گئی ہم پر عیاں

ہم نے جب بھی ان کو دیکھا ماہ کامل دیکھ کر