dil bahut masruf tha kal aaj be-karon mein hai

dil bahut masrūf thā kal aaj be-kāroñ meñ hai

saat pardoñ meñ jo rahtā thā vo bāzāroñ meñ hai

ḳhaak ke putle falak kī sarhadoñ ko chhū chuke

aur jise insān kahte haiñ abhī ġhāroñ meñ hai

laaj rakh lete haiñ merī muñh pe kuchh kahte nahīñ

dushmanī kā kuchh salīqa to mire pyāroñ meñ hai

sab ko dekhā aur kisī ko dekh kar TuuTā nahīñ

aa.ina shāyad abhī apne parastāroñ meñ hai

dhuup kaisī thī ki mere haath kaale kar ga.ī

tīrgī kā rañg shāyad nuur ke dhāroñ meñ hai

sab sadā.eñ lafz haiñ lafzoñ ke pīchhe kuchh nahīñ

dekhnā ye hai ki koī sar bhī dastāroñ meñ hai

bar-sar-e-paikār donoñ haiñ natīja kuchh nahīñ

josh hai dariyāoñ meñ aur sabr dīvāroñ meñ hai

ḳhair o shar kī mish.aloñ ko tū bujhātā kyuuñ nahīñ

maiñ to kyā huuñ ik farishta bhī gunahgāroñ meñ hai

dekhte kyā ho ki ḳhud manzar tumheñ takne lagā

bechte kyā ho ki yūsuf bhī ḳharīdāroñ meñ hai

koī bhī manzil nahīñ apnī kashish donoñ taraf

paañv miTTī meñ gaḌe haiñ aañkh sayyāroñ meñ hai

ab haqīqat jaan kar 'shahzād' kyā lenā mujhe

vaj.h-e-ġhāza hī sahī sho.ala to ruḳhsāroñ meñ hai

dil bahut masruf tha kal aaj be-karon mein hai

sat pardon mein jo rahta tha wo bazaron mein hai

KHak ke putle falak ki sarhadon ko chhu chuke

aur jise insan kahte hain abhi ghaaron mein hai

laj rakh lete hain meri munh pe kuchh kahte nahin

dushmani ka kuchh saliqa to mere pyaron mein hai

sab ko dekha aur kisi ko dekh kar TuTa nahin

aaina shayad abhi apne parastaron mein hai

dhup kaisi thi ki mere hath kale kar gai

tirgi ka rang shayad nur ke dhaaron mein hai

sab sadaen lafz hain lafzon ke pichhe kuchh nahin

dekhna ye hai ki koi sar bhi dastaron mein hai

bar-sar-e-paikar donon hain natija kuchh nahin

josh hai dariyaon mein aur sabr diwaron mein hai

KHair o shar ki mishalon ko tu bujhata kyun nahin

main to kya hun ek farishta bhi gunahgaron mein hai

dekhte kya ho ki KHud manzar tumhein takne laga

bechte kya ho ki yusuf bhi KHaridaron mein hai

koi bhi manzil nahin apni kashish donon taraf

panw miTTi mein gaDe hain aankh sayyaron mein hai

ab haqiqat jaan kar 'shahzad' kya lena mujhe

wajh-e-ghaza hi sahi shoala to ruKHsaron mein hai