dil bahut tang raha karta hai

dil bahut tañg rahā kartā hai

rañg be-rañg rahā kartā hai

husn meñ tere koī aib nahīñ

qubah meñ dañg rahā kartā hai

sulh kī dil se haiñ yaañ maslihateñ

vaañ sar-e-jañg rahā kartā hai

mohtasib ko tire mastānoñ se

ḳhauf-e-sarchañg rahā kartā hai

dil mirā pī ke mohabbat kī sharāb

nashsha meñ bhañg rahā kartā hai

fārsī aar hai mujh majnūñ ko

nañg se nañg rahā kartā hai

jauhar-e-teġh dikhātā hai husn

ishq chaurañg rahā kartā hai

guftanī haal nahīñ hai apnā

kuchh ajab Dhañg rahā kartā hai

halab-e-ruḳh meñ tire ḳhāloñ se

lashkar-e-zañg rahā kartā hai

manzil-e-gor ke dīvānoñ ke

siina par sañg rahā kartā hai

ālam-e-vajd tire mastoñ ko

be-daf-o-chañg rahā kartā hai

ḳhunduq-e-dast-e-sanam se nādim

gul-e-aurañg rahā kartā hai

tere gosh-e-shunavā kā mushtāq

har ḳhush-āhañg rahā kartā hai

bandish-e-chust se terī 'ātish'

qāfiya tañg rahā kartā hai

dil bahut tang raha karta hai

rang be-rang raha karta hai

husn mein tere koi aib nahin

qubah mein dang raha karta hai

sulh ki dil se hain yan maslihaten

wan sar-e-jang raha karta hai

mohtasib ko tere mastanon se

KHauf-e-sarchang raha karta hai

dil mera pi ke mohabbat ki sharab

nashsha mein bhang raha karta hai

farsi aar hai mujh majnun ko

nang se nang raha karta hai

jauhar-e-tegh dikhata hai husn

ishq chaurang raha karta hai

guftani haal nahin hai apna

kuchh ajab Dhang raha karta hai

halab-e-ruKH mein tere KHalon se

lashkar-e-zang raha karta hai

manzil-e-gor ke diwanon ke

sina par sang raha karta hai

aalam-e-wajd tere maston ko

be-daf-o-chang raha karta hai

KHunduq-e-dast-e-sanam se nadim

gul-e-aurang raha karta hai

tere gosh-e-shunawa ka mushtaq

har KHush-ahang raha karta hai

bandish-e-chust se teri 'atish'

qafiya tang raha karta hai