dil betab-e-marg-e-na-gahan baqi na rah jae

dil betāb-e-marg-e-nā-gahāñ baaqī na rah jaa.e

mohabbat kā ye nāzuk imtihāñ baaqī na rah jaa.e

sambhal kar phūñk ai barq-e-tapāñ mere nasheman ko

kahīñ ujlat meñ shāḳh-e-āshiyāñ baaqī na rah jaa.e

madad ai josh-e-girya ḳhūn-e-dil shāmil hai ashkoñ meñ

koī is silsila kī dāstāñ baaqī na rah jaa.e

mohabbat kī hadeñ is ālam-e-imkāñ se baalā haiñ

kisī kī justujū meñ lā-makāñ baaqī na rah jaa.e

tirī shān-e-karam par koī harf aa.e ma.āz-allāh

koī mai-ḳhvār ai pīr-e-muġhāñ baaqī na rah jaa.e

musāfir ishq kī manzil sarāpā raaz hotī hai

kahīñ chehre pe gard-e-kārvāñ baaqī na rah jaa.e

nasheman se qafas tak silsila ho barq-e-larzāñ kā

ye tarz-e-jaur bhī ai āsmāñ baaqī na rah jaa.e

tumhāre sāmne aañsū bhī tham tham kar nikalte haiñ

maiñ Dartā huuñ kahīñ ye dāstāñ baaqī na rah jaa.e

'mushīr' ab har nazar meñ ek lutf-e-ḳhās paatā huuñ

koī ishva nasīb-e-dushmanāñ baaqī na rah jaa.e

dil betab-e-marg-e-na-gahan baqi na rah jae

mohabbat ka ye nazuk imtihan baqi na rah jae

sambhal kar phunk ai barq-e-tapan mere nasheman ko

kahin ujlat mein shaKH-e-ashiyan baqi na rah jae

madad ai josh-e-girya KHun-e-dil shamil hai ashkon mein

koi is silsila ki dastan baqi na rah jae

mohabbat ki haden is aalam-e-imkan se baala hain

kisi ki justuju mein la-makan baqi na rah jae

teri shan-e-karam par koi harf aae maaz-allah

koi mai-KHwar ai pir-e-mughan baqi na rah jae

musafir ishq ki manzil sarapa raaz hoti hai

kahin chehre pe gard-e-karwan baqi na rah jae

nasheman se qafas tak silsila ho barq-e-larzan ka

ye tarz-e-jaur bhi ai aasman baqi na rah jae

tumhaare samne aansu bhi tham tham kar nikalte hain

main Darta hun kahin ye dastan baqi na rah jae

'mushir' ab har nazar mein ek lutf-e-KHas pata hun

koi ishwa nasib-e-dushmanan baqi na rah jae