dil bhi ba-zid hai aur taqaza-e-yar bhi

dil bhī ba-zid hai aur taqāzā-e-yār bhī

ik bojh hai anā kā labāda utaar bhī

apnī shikastagī kā mujhe ġham nahīñ magar

bikhre paḌe hue haiñ yahāñ vaz.a-dār bhī

vo qahr hai ki dasht-o-bayābāñ pe bas nahīñ

uḌtī hai ḳhaak ab ke sar-e-kohsār bhī

ghaT jā.egā shikasta badan ke hisār meñ

tū apne aap ko kahīñ ruk kar pukār bhī

ḳhud ko sameTne hī chalā thā ki ye khulā

hai aur intishār pas-e-intishār bhī

vo vaqt aa paḌā ki sabhī dam-ba-ḳhud rahe

kaam aa sakā na apne lahū kā hisār bhī

kis dhund meñ ulajhne lagā huuñ maiñ aaj shaam

be-manzarī kī ḳhaak hai āñkhoñ ke paar bhī

dil bhi ba-zid hai aur taqaza-e-yar bhi

ek bojh hai ana ka labaada utar bhi

apni shikastagi ka mujhe gham nahin magar

bikhre paDe hue hain yahan waza-dar bhi

wo qahr hai ki dasht-o-bayaban pe bas nahin

uDti hai KHak ab ke sar-e-kohsar bhi

ghaT jaega shikasta badan ke hisar mein

tu apne aap ko kahin ruk kar pukar bhi

KHud ko sameTne hi chala tha ki ye khula

hai aur intishaar pas-e-intishaar bhi

wo waqt aa paDa ki sabhi dam-ba-KHud rahe

kaam aa saka na apne lahu ka hisar bhi

kis dhund mein ulajhne laga hun main aaj sham

be-manzari ki KHak hai aankhon ke par bhi