dil-bhitar barsat hui hai

dil-bhītar barsāt huī hai

yuuñ bhī guzar auqāt huī hai

band darīche suunī galiyāñ

lauT chalo ghar raat huī hai

shart lagā kar jab bhī khele

khel meñ ham ko maat huī hai

biit ga.iiñ lo hijr kī ghaḌiyāñ

ḳhatm shab-e-zulmāt huī hai

is kūche aa nikle jab bhī

saath meñ ik bārāt huī hai

jis ne bhī sach bolā baḌh kar

ḳhilqat us ke saath huī hai

rūThe rūThe kyuuñ rahte ho

kuchh to kaho kyā baat huī hai

itnā baḌā ilzām hai ham par

itnī zarā sī baat huī hai

hifz bayāz-e-mīr hai jis ko

us ko atā sauġhāt huī hai

qufl-e-tilism-e-harf khulā hai

sharh-e-kitāb-e-zāt huī hai

vaqt-e-nuzūl-e-sher hai 'ḳhusrav'

sub.h ga.ī ab raat huī hai

dil-bhitar barsat hui hai

yun bhi guzar auqat hui hai

band dariche suni galiyan

lauT chalo ghar raat hui hai

shart laga kar jab bhi khele

khel mein hum ko mat hui hai

bit gain lo hijr ki ghaDiyan

KHatm shab-e-zulmat hui hai

is kuche aa nikle jab bhi

sath mein ek baraat hui hai

jis ne bhi sach bola baDh kar

KHilqat us ke sath hui hai

ruThe ruThe kyun rahte ho

kuchh to kaho kya baat hui hai

itna baDa ilzam hai hum par

itni zara si baat hui hai

hifz bayaz-e-mir hai jis ko

us ko ata saughat hui hai

qufl-e-tilism-e-harf khula hai

sharh-e-kitab-e-zat hui hai

waqt-e-nuzul-e-sher hai 'KHusraw'

subh gai ab raat hui hai