dil chaak-chaak ishq mein hai sina dagh-dagh

dil chāk-chāk ishq meñ hai siina dāġh-dāġh

is chāk-o-dāġh se ho ḳhiyābān bāġh-bāġh

kyoñ daaġh ko na ho mire dil kī qabā pasand

sahrā-e-vahshatoñ se ye dil aur kulāġh daaġh

chāk-e-dil-o-jigar meñ basā jab se soz-e-ishq

jaltī hai aag ishq se aur haiñ ujāġh daaġh

furqat meñ terī sāqiyā ġham kā huuñ mehmāñ

merī sharāb ḳhūn-e-jigar hai ayāġh daaġh

hote haiñ laakh naaz rafīq-e-shafīq ko

bejā nahīñ hai dil se kare gar dimāġh daaġh

maiñ tere dūd-e-zulf se ai sham.a tīra-roz

merī shab-e-siyah se falak kā charāġh daaġh

apnā sabaq hamesha rahā ain-o-shīn-o-qāf

tahsīl se hamārī haiñ ahl-e-dimāġh daaġh

rahzan tarīq-e-shauq meñ hai ḳhvāhish-e-dalīl

gar ātish-e-talab hai zabān-e-surāġh daaġh

jāñ-soz-tar thā vasl 'shahīdī' firāq se

āshiq kī sair-gasht se haiñ baaġh dāġh-dāġh

dil chaak-chaak ishq mein hai sina dagh-dagh

is chaak-o-dagh se ho KHiyaban bagh-bagh

kyon dagh ko na ho mere dil ki qaba pasand

sahra-e-wahshaton se ye dil aur kulagh dagh

chaak-e-dil-o-jigar mein basa jab se soz-e-ishq

jalti hai aag ishq se aur hain ujagh dagh

furqat mein teri saqiya gham ka hun mehman

meri sharab KHun-e-jigar hai ayagh dagh

hote hain lakh naz rafiq-e-shafiq ko

beja nahin hai dil se kare gar dimagh dagh

main tere dud-e-zulf se ai shama tira-roz

meri shab-e-siyah se falak ka charagh dagh

apna sabaq hamesha raha ain-o-shin-o-qaf

tahsil se hamari hain ahl-e-dimagh dagh

rahzan tariq-e-shauq mein hai KHwahish-e-dalil

gar aatish-e-talab hai zaban-e-suragh dagh

jaan-soz-tar tha wasl 'shahidi' firaq se

aashiq ki sair-gasht se hain bagh dagh-dagh