dil churana ye kaam hai tera

dil churānā ye kaam hai terā

le gayā hai to naam hai terā

hai qayāmat bapā ki jalve meñ

qāmat-e-ḳhush-ḳhirām hai terā

jis ne aalam kiyā hai zer-o-zabar

ye ḳhat-e-mushk-fām hai terā

diid karne ko chāhiyeñ āñkheñ

har taraf jalva aam hai terā

kis kā ye ḳhuuñ kiye tū aatā hai

dāman afshāñ tamām hai terā

ho na ho tū hamārī majlis meñ

tazkira sub.h o shaam hai terā

teġh-e-abrū hameñ bhī de ik zaḳhm

sar pe aalam ke daam hai terā

tū jo kahtā hai 'mus.hafī' idhar aa

'mus.hafī' kyā ġhulām hai terā

dil churana ye kaam hai tera

le gaya hai to nam hai tera

hai qayamat bapa ki jalwe mein

qamat-e-KHush-KHiram hai tera

jis ne aalam kiya hai zer-o-zabar

ye KHat-e-mushk-fam hai tera

did karne ko chahiyen aankhen

har taraf jalwa aam hai tera

kis ka ye KHun kiye tu aata hai

daman afshan tamam hai tera

ho na ho tu hamari majlis mein

tazkira subh o sham hai tera

tegh-e-abru hamein bhi de ek zaKHm

sar pe aalam ke dam hai tera

tu jo kahta hai 'mushafi' idhar aa

'mushafi' kya ghulam hai tera