dil dasht hai wafur-e-tamanna ghubar hai

dil dasht hai vafūr-e-tamannā ġhubār hai

ai abr-e-nau-umīd tirā intizār hai

phir ustuvār rābta-e-sañg-o-sar huā

phir in dinoñ junūñ ko havā sāzgār hai

jāñ-dādgī kī rasm jagāo ki āj-kal

phir multafit havā-e-sar-e-rah-guzār hai

har nik.hat-e-ḳhayāl asīr-e-havā huī

har mauj-e-nūr kam-nigahī kī shikār hai

raushan-zamīr tīra-nasībī ḳhudā kī shaan

itnī sī ab hikāyat lail-o-nahār hai

haañ ai havā-e-dasht idhar shahr meñ bhī aa

mahbūs kab se nik.hat-e-gesu-e-yār hai

kahiye to kis tarah jo na kahiye to kis tarah

arz-e-suḳhan meñ lafz bhī be-e'tibār hai

lab-basta dil-e-kushāda chaman meñ guzāriye

ye ġhunchagī kī rasm guloñ kā shi.ār hai

'bāqar' ġhazal meñ ramz-o-kināya bajā magar

ye ehtiyāt harf-e-tamannā pe baar hai

dil dasht hai wafur-e-tamanna ghubar hai

ai abr-e-nau-umid tera intizar hai

phir ustuwar rabta-e-sang-o-sar hua

phir in dinon junun ko hawa sazgar hai

jaan-dadgi ki rasm jagao ki aaj-kal

phir multafit hawa-e-sar-e-rah-guzar hai

har nikhat-e-KHayal asir-e-hawa hui

har mauj-e-nur kam-nigahi ki shikar hai

raushan-zamir tira-nasibi KHuda ki shan

itni si ab hikayat lail-o-nahaar hai

han ai hawa-e-dasht idhar shahr mein bhi aa

mahbus kab se nikhat-e-gesu-e-yar hai

kahiye to kis tarah jo na kahiye to kis tarah

arz-e-suKHan mein lafz bhi be-e'tibar hai

lab-basta dil-e-kushada chaman mein guzariye

ye ghunchagi ki rasm gulon ka shiar hai

'baqar' ghazal mein ramz-o-kinaya baja magar

ye ehtiyat harf-e-tamanna pe bar hai