dil dasht ki surat tha samundar hua kaise

dil dasht kī sūrat thā samundar huā kaise

sarsabz ḳhizāñ-zād muqaddar huā kaise

chhāñv meñ Dhalā kaise tamāzat bharā mausam

phūloñ se bhī nāzuk mirā paikar huā kaise

phirtī thī tamannāoñ bharī shaal lapeTe

phir jazba-e-gumnām ujāgar huā kaise

muddat se ye uljhī huī gutthī nahīñ suljhī

vo mujh meñ samāyā thā to be-ghar huā kaise

ik umr kisī pal jo mire haath nā aayā

vo ḳhvāb sā ehsās musaḳhḳhar huā kaise

ik raaz jo hamrāz rahā barsoñ 'samīna'

ab sochtī huuñ faash jahāñ par huā kaise

dil dasht ki surat tha samundar hua kaise

sarsabz KHizan-zad muqaddar hua kaise

chhanw mein Dhala kaise tamazat bhara mausam

phulon se bhi nazuk mera paikar hua kaise

phirti thi tamannaon bhari shaal lapeTe

phir jazba-e-gumnam ujagar hua kaise

muddat se ye uljhi hui gutthi nahin suljhi

wo mujh mein samaya tha to be-ghar hua kaise

ek umr kisi pal jo mere hath na aaya

wo KHwab sa ehsas musaKHKHar hua kaise

ek raaz jo hamraaz raha barson 'samina'

ab sochti hun fash jahan par hua kaise