dil diya hai humne bhi wo mah-e-kaamil dekh kar

dil diyā hai ham ne bhī vo māh-e-kāmil dekh kar

zard ho jaatī hai jis ko sham-e-mahfil dekh kar

tere aariz pe ye nuqta bhī hai kitnā intiḳhāb

ho gayā raushan tire ruḳhsār kā til dekh kar

qatl karnā be-gunāhoñ kā koī āsān hai

ḳhushk qātil kā lahū hai ḳhūn-e-bismil dekh kar

balliyoñ fart-e-masarrat se uchhal jaatā hai dil

bahr-e-ġham meñ duur se dāmān-e-sāhil dekh kar

ā.īne ne kar diyā yaktā.ī kā daavā ġhalat

naqsh-e-hairat ban ga.e apnā muqābil dekh kar

dekh to leñ dil meñ tere ghar bhī kar sakte haiñ ham

dil to ham deñge tujhe lekin tirā dil dekh kar

dekhiye rāh-e-adam meñ aur pesh aatā hai kyā

hosh parrāñ ho rahe haiñ pahlī manzil dekh kar

ārzu-e-hūr kyā ho 'nāz' dil de kar unheñ

sham.a par kyā aañkh Dāleñ māh-e-kāmil dekh kar

dil diya hai hum ne bhi wo mah-e-kaamil dekh kar

zard ho jati hai jis ko sham-e-mahfil dekh kar

tere aariz pe ye nuqta bhi hai kitna intiKHab

ho gaya raushan tere ruKHsar ka til dekh kar

qatl karna be-gunahon ka koi aasan hai

KHushk qatil ka lahu hai KHun-e-bismil dekh kar

balliyon fart-e-masarrat se uchhal jata hai dil

bahr-e-gham mein dur se daman-e-sahil dekh kar

aaine ne kar diya yaktai ka dawa ghalat

naqsh-e-hairat ban gae apna muqabil dekh kar

dekh to len dil mein tere ghar bhi kar sakte hain hum

dil to hum denge tujhe lekin tera dil dekh kar

dekhiye rah-e-adam mein aur pesh aata hai kya

hosh parran ho rahe hain pahli manzil dekh kar

aarzu-e-hur kya ho 'naz' dil de kar unhen

shama par kya aankh Dalen mah-e-kaamil dekh kar