dil diya tab ki bahut zulf-e-rasa ne chaha

dil diyā tab ki bahut zulf-e-rasā ne chāhā

aap farmāte haiñ yuuñ us kī balā ne chāhā

tā-dam-e-marg na hoñ tujh se mirī jaan judā

maiñ ne chāhā thā va-lekin na ḳhudā ne chāhā

chal base dekhte hī chaal adā kī ham to

ho ve qissa hī adā terī adā ne chāhā

ghar se kis tarah se yuuñ hazrat-e-mun.im nikleñ

dī na buubū ne ijāzat na divāne chāhā

ho ke yak-dast tire aur hī ai yār-e-numūd

jab tujhe ham se kisī be-sar-o-pā ne chāhā

marte marte bhī na yak-bār tujhe dekh liyā

is qadar bhī na mirī jaan qazā ne chāhā

koī apnā na huā silsila-jumbān-e-junūñ

ek fil-jumla usī zulf-e-dotā ne chāhā

jis tarah chāho satāo mujhe har roz buto

us kā ik raat evaz lūñgā ḳhudā ne chāhā

nām-e-anqā se bhī nañg aatā hai 'ehsān' mujhe

shohra-e-nām ko kyuuñ ahl-e-fanā ne chāhā

dil diya tab ki bahut zulf-e-rasa ne chaha

aap farmate hain yun us ki bala ne chaha

ta-dam-e-marg na hon tujh se meri jaan juda

main ne chaha tha wa-lekin na KHuda ne chaha

chal base dekhte hi chaal ada ki hum to

ho we qissa hi ada teri ada ne chaha

ghar se kis tarah se yun hazrat-e-munim niklen

di na bubu ne ijazat na diwane chaha

ho ke yak-dast tere aur hi ai yar-e-numud

jab tujhe hum se kisi be-sar-o-pa ne chaha

marte marte bhi na yak-bar tujhe dekh liya

is qadar bhi na meri jaan qaza ne chaha

koi apna na hua silsila-jumban-e-junun

ek fil-jumla usi zulf-e-dota ne chaha

jis tarah chaho satao mujhe har roz buto

us ka ek raat ewaz lunga KHuda ne chaha

nam-e-anqa se bhi nang aata hai 'ehsan' mujhe

shohra-e-nam ko kyun ahl-e-fana ne chaha