dil diya wahshat liya aur KHud ko ruswa kar liya

dil diyā vahshat liyā aur ḳhud ko rusvā kar liyā

muḳhtasar sī zindagī meñ maiñ ne kyā kyā kar liyā

dil kī ḳhātir kufr bhī us ne gavārā kar liyā

ek patthar ḳhud tarāshā ḳhud hī sajda kar liyā

aap kī chāhat kā milnā jaan lūñgā muft hai

jaan de kar bhī agar maiñ ne ye saudā kar liyā

bāl-o-par apne salāmat Dar añdheroñ kā nahīñ

chaar tinke jab bhī phūñke haiñ ujālā kar liyā

dard baḳhshā chain chhīnā dil ke TukḌe kar diye

haa.e kis zālim pe maiñ ne bhī bharosa kar liyā

'shauq' jab tak saañs hai tab tak hai ummīd-e-hayāt

kyuuñ abhī se aap ne dil apnā chhoTā kar liyā

dil diya wahshat liya aur KHud ko ruswa kar liya

muKHtasar si zindagi mein main ne kya kya kar liya

dil ki KHatir kufr bhi us ne gawara kar liya

ek patthar KHud tarasha KHud hi sajda kar liya

aap ki chahat ka milna jaan lunga muft hai

jaan de kar bhi agar main ne ye sauda kar liya

baal-o-par apne salamat Dar andheron ka nahin

chaar tinke jab bhi phunke hain ujala kar liya

dard baKHsha chain chhina dil ke TukDe kar diye

hae kis zalim pe main ne bhi bharosa kar liya

'shauq' jab tak sans hai tab tak hai ummid-e-hayat

kyun abhi se aap ne dil apna chhoTa kar liya