دل دکھ نہ جائے بات کوئی بے سبب نہ پوچھ

دل دکھ نہ جائے بات کوئی بے سبب نہ پوچھ

خانہ بدوش لوگوں سے نام و نسب نہ پوچھ

حد آسماں کی پوچھ زمیں کا ادب نہ پوچھ

کن منزلوں میں ہے مری پرواز اب نہ پوچھ

نان جویں کی آس بھی کیا شے ہے اب نہ پوچھ

پردیسیوں سے مشغلۂ روز‌ و شب نہ پوچھ

بے گھر ہوئے ہیں دیدۂ بے خواب کے قتیل

اب جگنوؤں سے لذت روداد شب نہ پوچھ

تیرے لیے ہوں آئینۂ پاش پاش میں

کیا کیا ہے میرے واسطے اک تیری چھب نہ پوچھ

پیاسے ہیں جیسے ایک سمندر میں رہ کے ہم

تیرے بغیر زندگی کرنے کا ڈھب نہ پوچھ

میرے لہو ترنگ سے ٹھیرا ہے سرخ رو

کیا کیا نہ رنگ ہیں تری آنکھوں کے اب نہ پوچھ

اک شعلۂ شراب بھی ہیں آفتاب بھی

اس زمہریر میں ترے شاداب لب نہ پوچھ

ہم خود شناس بھی ہیں زمانہ شناس بھی

اس مرحلے میں جان سے گزرے ہیں کب نہ پوچھ