dil dukh na jae baat koi be-sabab na puchh

dil dukh na jaa.e baat koī be-sabab na pūchh

ḳhāna-ba-dosh logoñ se nām-o-nasab na pūchh

had āsmāñ kī pūchh zamīñ kā adab na pūchh

kin manziloñ meñ hai mirī parvāz ab na pūchh

nān-e-javīñ kī aas bhī kyā shai hai ab na pūchh

pardesiyoñ se mashġhala-e-roz-o-shab na pūchh

be-ghar hue haiñ dīda-e-be-ḳhvāb ke qatīl

ab jugnuoñ se lazzat-e-rūdād-e-shab na pūchh

tere liye huuñ ā.īna-e-pāsh-pāsh meñ

kyā kyā hai mere vāste ik terī chhab na pūchh

pyāse haiñ jaise ek samundar meñ rah ke ham

tere baġhair zindagī karne kā Dhab na pūchh

mere lahū tarañg se Therā hai surḳh-rū

kyā kyā na rañg haiñ tirī āñkhoñ ke ab na pūchh

ik sho.ala-e-sharāb bhī haiñ āftāb bhī

is zamharīr meñ tire shādāb lab na pūchh

ham ḳhud-shanās bhī haiñ zamāna-shanās bhī

is marhale meñ jaan se guzre haiñ kab na pūchh

dil dukh na jae baat koi be-sabab na puchh

KHana-ba-dosh logon se nam-o-nasab na puchh

had aasman ki puchh zamin ka adab na puchh

kin manzilon mein hai meri parwaz ab na puchh

nan-e-jawin ki aas bhi kya shai hai ab na puchh

pardesiyon se mashghala-e-roz-o-shab na puchh

be-ghar hue hain dida-e-be-KHwab ke qatil

ab jugnuon se lazzat-e-rudad-e-shab na puchh

tere liye hun aaina-e-pash-pash mein

kya kya hai mere waste ek teri chhab na puchh

pyase hain jaise ek samundar mein rah ke hum

tere baghair zindagi karne ka Dhab na puchh

mere lahu tarang se Thera hai surKH-ru

kya kya na rang hain teri aankhon ke ab na puchh

ek shoala-e-sharab bhi hain aaftab bhi

is zamharir mein tere shadab lab na puchh

hum KHud-shanas bhi hain zamana-shanas bhi

is marhale mein jaan se guzre hain kab na puchh