dil dukhana tumhaari fitrat hai

dil dukhānā tumhārī fitrat hai

choT khānā hamārī aadat hai

mujh ko yūñhī ḳharāb honā thā

be-sabab tum ko kyuuñ nadāmat hai

jhāñk kar ek baar āñkhoñ meñ

ḳhud hī paḌh lo jo dil kī hālat hai

rāh-e-ulfat meñ jaan de denā

is se baḌh kar koī shahādat hai

terī furqat ho yā tirī qurbat

ek dozaḳh hai ek jannat hai

tum ne dekhā hai aise jalvoñ ko

kis liye mujh se phir shikāyat hai

is bharose gunāh kartā huuñ

baḳhsh denā tumhārī fitrat hai

sū-e-mai-ḳhāna uTh chale haiñ qadam

jaise ye bhī koī ibādat hai

zindagī ko sambhāl kar rakhnā

ek be-dard kī amānat hai

dard hī dard jis ke sheroñ meñ

aur hai kaun sirf 'hairat' hai

dil dukhana tumhaari fitrat hai

choT khana hamari aadat hai

mujh ko yunhi KHarab hona tha

be-sabab tum ko kyun nadamat hai

jhank kar ek bar aankhon mein

KHud hi paDh lo jo dil ki haalat hai

rah-e-ulfat mein jaan de dena

is se baDh kar koi shahadat hai

teri furqat ho ya teri qurbat

ek dozaKH hai ek jannat hai

tum ne dekha hai aise jalwon ko

kis liye mujh se phir shikayat hai

is bharose gunah karta hun

baKHsh dena tumhaari fitrat hai

su-e-mai-KHana uTh chale hain qadam

jaise ye bhi koi ibaadat hai

zindagi ko sambhaal kar rakhna

ek be-dard ki amanat hai

dard hi dard jis ke sheron mein

aur hai kaun sirf 'hairat' hai