dil dukhi hai raat kaTun kis tarah

dil dukhī hai raat kāTūñ kis tarah

dard kī bohtāt kāTūñ kis tarah

aaḌe aa.e jā rahā hai dil mirā

nā-samajh jazbāt kāTūñ kis tarah

jhuuT kī tash.hīr hai ab kū-ba-kū

jhuuT ke maiñ haath kāTūñ kis tarah

fatvā lag jaanā hai mujh par kufr kā

aap kī maiñ baat kāTūñ kis tarah

ek ġham terā hai duujā saañs kā

anginat sadmāt kāTūñ kis tarah

saare 'ālim saare muftī haiñ yahāñ

pur-fitan hālāt kāTūñ kis tarah

jahl qābiz mimbar-o-mehrāb par

chup rahūñ lamhāt kāTūñ kis tarah

maiñ diye 'mājid' jalā.ūñgā yūñhī

āgahī kī maat kāTūñ kis tarah

dil dukhi hai raat kaTun kis tarah

dard ki bohtat kaTun kis tarah

aaDe aae ja raha hai dil mera

na-samajh jazbaat kaTun kis tarah

jhuT ki tashhir hai ab ku-ba-ku

jhuT ke main hath kaTun kis tarah

fatwa lag jaana hai mujh par kufr ka

aap ki main baat kaTun kis tarah

ek gham tera hai duja sans ka

anginat sadmat kaTun kis tarah

sare 'alim sare mufti hain yahan

pur-fitan haalat kaTun kis tarah

jahl qabiz mimbar-o-mehrab par

chup rahun lamhat kaTun kis tarah

main diye 'majid' jalaunga yunhi

aagahi ki mat kaTun kis tarah