dil-e-azurda ko bahlae hue hain hum log

dil-e-āzurda ko bahlā.e hue haiñ ham log

kitne ḳhvāboñ kī qasam khaa.e hue haiñ ham log

ek aalam ke harīf ek zamāne ke naqīb

jaise tārīḳh ke dohrā.e hue haiñ ham log

ek muddat huī ham DhūñDh rahe haiñ ḳhud ko

apnī āvāz ke bhaTkā.e hue haiñ ham log

jis ke sho.aloñ se numū pā.eñge kuchh phuul na.e

aag siine meñ vo dahkā.e hue haiñ ham log

jin se bedār huā lazzat-e-āzār kā zauq

choTeñ aisī bhī ka.ī khaa.e hue haiñ ham log

ek gutthī jo sulajh kar bhī na suljhī zinhār

us ko suljhā ke bhī uljhā.e hue haiñ ham log

hosh meñ rah ke bhī lāzim hai ki mad.hosh raheñ

raaz āñkhoñ kā tirī paa.e hue haiñ ham log

gardish-e-vaqt koī aur Thikānā batlā

mahfil-e-dost se uktā.e hue haiñ ham log

aañch aa.ī na kaḌī dhuup meñ lekin 'hurmat'

chāñdnī rātoñ ke suno laa.e hue haiñ ham log

dil-e-azurda ko bahlae hue hain hum log

kitne KHwabon ki qasam khae hue hain hum log

ek aalam ke harif ek zamane ke naqib

jaise tariKH ke dohrae hue hain hum log

ek muddat hui hum DhunDh rahe hain KHud ko

apni aawaz ke bhaTkae hue hain hum log

jis ke shoalon se numu paenge kuchh phul nae

aag sine mein wo dahkae hue hain hum log

jin se bedar hua lazzat-e-azar ka zauq

choTen aisi bhi kai khae hue hain hum log

ek gutthi jo sulajh kar bhi na suljhi zinhaar

us ko suljha ke bhi uljhae hue hain hum log

hosh mein rah ke bhi lazim hai ki madhosh rahen

raaz aankhon ka teri pae hue hain hum log

gardish-e-waqt koi aur Thikana batla

mahfil-e-dost se uktae hue hain hum log

aanch aai na kaDi dhup mein lekin 'hurmat'

chandni raaton ke suno lae hue hain hum log