dil-e-barbaad ko aabaad kiya hai maine

dil-e-barbād ko ābād kiyā hai maiñ ne

aaj muddat meñ tumheñ yaad kiyā hai maiñ ne

zauq-e-parvāz-e-tab-o-tāb atā farmā kar

said ko lā.iq-e-sayyād kiyā hai maiñ ne

talḳhī-e-daur-e-guzishtā kā tasavvur kar ke

dil ko phir mā.il-e-fariyād kiyā hai maiñ ne

aaj is soz-e-tasavvur kī ḳhushī meñ ai dost

tā.ir-e-sabr ko āzād kiyā hai maiñ ne

ho ke isrār-e-ġham-e-tāzā se majbūr-e-fuġhāñ

chashm ko ashk-e-tar imdād kiyā hai maiñ ne

tum jise kahte the hañgāma-pasandī merī

phir vahī tarz-e-ġham ījād kiyā hai maiñ ne

phir gavārā hai mujhe ishq kī har ik mushkil

taaza phir sheva-e-farhād kiyā hai maiñ ne

dil-e-barbaad ko aabaad kiya hai main ne

aaj muddat mein tumhein yaad kiya hai main ne

zauq-e-parwaz-e-tab-o-tab ata farma kar

said ko laiq-e-sayyaad kiya hai main ne

talKHi-e-daur-e-guzishta ka tasawwur kar ke

dil ko phir mail-e-fariyaad kiya hai main ne

aaj is soz-e-tasawwur ki KHushi mein ai dost

tair-e-sabr ko aazad kiya hai main ne

ho ke israr-e-gham-e-taza se majbur-e-fughan

chashm ko ashk-e-tar imdad kiya hai main ne

tum jise kahte the hangama-pasandi meri

phir wahi tarz-e-gham ijad kiya hai main ne

phir gawara hai mujhe ishq ki har ek mushkil

taza phir shewa-e-farhad kiya hai main ne