dil-e-diwana arz-e-haal par mail to kya hoga

dil-e-dīvāna arz-e-hāl par maa.il to kyā hogā

magar vo pūchh baiThe ḳhud hī hāl-e-dil to kyā hogā

hamārā kyā hameñ to Dūbnā hai Duub jā.eñge

magar tūfān jā pahuñchā lab-e-sāhil to kyā hogā

sharāb-e-nāb hī se hosh uḌ jaate haiñ insāñ ke

tirā kaif-e-nazar bhī ho gayā shāmil to kyā hogā

ḳhirad kī rahbarī ne to hameñ ye din dikhā.e haiñ

junūñ ho jā.egā jab rahbar-e-manzil to kyā hogā

koī pūchhe to sāhil par bharosa karne vāloñ se

agar tūfāñ kī zad meñ aa gayā sāhil to kyā hogā

ḳhud us kī zindagī ab us se barham hotī jaatī hai

unheñ hogā bhī pās-e-ḳhātir-e-'qābil' to kyā hogā

dil-e-diwana arz-e-haal par mail to kya hoga

magar wo puchh baiThe KHud hi haal-e-dil to kya hoga

hamara kya hamein to Dubna hai Dub jaenge

magar tufan ja pahuncha lab-e-sahil to kya hoga

sharab-e-nab hi se hosh uD jate hain insan ke

tera kaif-e-nazar bhi ho gaya shamil to kya hoga

KHirad ki rahbari ne to hamein ye din dikhae hain

junun ho jaega jab rahbar-e-manzil to kya hoga

koi puchhe to sahil par bharosa karne walon se

agar tufan ki zad mein aa gaya sahil to kya hoga

KHud us ki zindagi ab us se barham hoti jati hai

unhen hoga bhi pas-e-KHatir-e-'qabil' to kya hoga