dil-e-diwana ki bhule hi se ghar rahta hai

dil-e-dīvāna ki bhūle hī se ghar rahtā hai

zikr kyuuñ us kā magar shām-o-sahar rahtā hai

sīñchte rahiye use ḳhūn-e-jigar se aksar

be-samar varna tamannā kā shajar rahtā hai

bistar-e-shab pe taḌapte hī guzar jaa.e magar

dast-e-ummīd meñ dāmān-e-sahar rahtā hai

zaḳhm lagte hī rahe rūh-o-badan par itne

nahīñ ma.alūm ki ab dard kidhar rahtā hai

dasht-e-ulfat meñ kaḌī dhuup ke sannāTe haiñ

abr-e-ḳhush-rañg na saa.e kā guzar rahtā hai

yuuñ hī par tolte rahnā hai asīroñ ko yahāñ

qafas-e-shauq kā dar band agar rahtā hai

dam-ba-dam aatī hai āvāz-e-jaras kī 'rāhī'

koī to mujh meñ hai jo mahv-e-safar rahtā hai

dil-e-diwana ki bhule hi se ghar rahta hai

zikr kyun us ka magar sham-o-sahar rahta hai

sinchte rahiye use KHun-e-jigar se aksar

be-samar warna tamanna ka shajar rahta hai

bistar-e-shab pe taDapte hi guzar jae magar

dast-e-ummid mein daman-e-sahar rahta hai

zaKHm lagte hi rahe ruh-o-badan par itne

nahin malum ki ab dard kidhar rahta hai

dasht-e-ulfat mein kaDi dhup ke sannaTe hain

abr-e-KHush-rang na sae ka guzar rahta hai

yun hi par tolte rahna hai asiron ko yahan

qafas-e-shauq ka dar band agar rahta hai

dam-ba-dam aati hai aawaz-e-jaras ki 'rahi'

koi to mujh mein hai jo mahw-e-safar rahta hai