dil gham ka talabgar hai malum nahin kyun

dil ġham kā talabgār hai ma.alūm nahīñ kyuuñ

rāhat se ye bezār hai ma.alūm nahīñ kyuuñ

haq ye hai ki ham donoñ mohabbat meñ bañdhe haiñ

lekin use inkār hai ma.alūm nahīñ kyuuñ

jo mo'atabar thā ahl-e-zamāna kī nazar meñ

rusvā sar-e-bāzār hai mālūm nahīñ kyuuñ

maiñ bhūlnā chāhūñ bhī bhulā pā.ūñ na un ko

kuchh aisā sarokār hai mālūm nahīñ kyuuñ

jo bhī ho ġhalat baat jhaTak detā hai aksar

is darja vo ḳhuddār hai mālūm nahīñ kyuuñ

insān kisī baat pe rahtā nahīñ qaa.em

ye zehn se bīmār hai mālūm nahīñ kyuuñ

ḳhāmosh sī rahtī hai zabāñ us kī barābar

dil mā.il-e-guftār hai mālūm nahīñ kyuuñ

qurbat bhī kisī kī nahīñ hai raas 'karan' ko

ye ḳhud se hī bezār hai mālūm nahīñ kyuuñ

dil gham ka talabgar hai malum nahin kyun

rahat se ye bezar hai malum nahin kyun

haq ye hai ki hum donon mohabbat mein bandhe hain

lekin use inkar hai malum nahin kyun

jo mo'atabar tha ahl-e-zamana ki nazar mein

ruswa sar-e-bazar hai malum nahin kyun

main bhulna chahun bhi bhula paun na un ko

kuchh aisa sarokar hai malum nahin kyun

jo bhi ho ghalat baat jhaTak deta hai aksar

is darja wo KHuddar hai malum nahin kyun

insan kisi baat pe rahta nahin qaem

ye zehn se bimar hai malum nahin kyun

KHamosh si rahti hai zaban us ki barabar

dil mail-e-guftar hai malum nahin kyun

qurbat bhi kisi ki nahin hai ras 'karan' ko

ye KHud se hi bezar hai malum nahin kyun