dil-e-girafta ke sab pech-o-tab khol ke dekh

dil-e-girafta ke sab pech-o-tāb khol ke dekh

havā kā zor muhīt-e-hubāb khol ke dekh

mire lahū ko numā.ish-gah-e-vafā se uThā

hai jam.a o ḳharch bahut ye hisāb khol ke dekh

ye kis ke zulm se har shai hai misl-e-sañg ḳhamosh

ai naqsh-gar dar-e-shahr-e-ḳharāb khol ke dekh

kahīñ to dasht meñ Thahregī mauj-e-āb-e-gurez

ravāñ huā hai to rāz-e-sarāb khol ke dekh

dhaḌakte dil se na maujoñ kī razm-gah meñ utar

ḳhat-e-safar ko kaf-e-dast-e-āb khol ke dekh

haiñ kab se tishna-e-ma.anī mire hurūf-e-badan

farāġh ho to kabhī ye kitāb khol ke dekh

zarā surāġh lagā mere rañg-e-ḳhasta kā

ġhamoñ kī dhuup meñ band-e-naqāb khol ke dekh

guloñ ko kis liye Dastī haiñ chāñdnī rāteñ

kahāñ hai zahr rag-e-māhtāb khol ke dekh

mazā to jab hai ki gulshan meñ jashn-e-sho.ala ho

bharī bahār meñ dāġh-e-gulāb khol ke dekh

kanār-e-dasht-e-balā kaun hai makīñ 'shāhīñ'

ḳhamosh suunī havelī kā baab khol ke dekh

dil-e-girafta ke sab pech-o-tab khol ke dekh

hawa ka zor muhit-e-hubab khol ke dekh

mere lahu ko numaish-gah-e-wafa se uTha

hai jama o KHarch bahut ye hisab khol ke dekh

ye kis ke zulm se har shai hai misl-e-sang KHamosh

ai naqsh-gar dar-e-shahr-e-KHarab khol ke dekh

kahin to dasht mein Thahregi mauj-e-ab-e-gurez

rawan hua hai to raaz-e-sarab khol ke dekh

dhaDakte dil se na maujon ki razm-gah mein utar

KHat-e-safar ko kaf-e-dast-e-ab khol ke dekh

hain kab se tishna-e-mani mere huruf-e-badan

faragh ho to kabhi ye kitab khol ke dekh

zara suragh laga mere rang-e-KHasta ka

ghamon ki dhup mein band-e-naqab khol ke dekh

gulon ko kis liye Dasti hain chandni raaten

kahan hai zahr rag-e-mahtab khol ke dekh

maza to jab hai ki gulshan mein jashn-e-shoala ho

bhari bahaar mein dagh-e-gulab khol ke dekh

kanar-e-dasht-e-bala kaun hai makin 'shahin'

KHamosh suni haweli ka bab khol ke dekh