dil-e-hazin ko na malum kyun qarar nahin

dil-e-hazīñ ko na mālūm kyuuñ qarār nahīñ

nigāh-e-shauq to pāband-e-e'tibār nahīñ

ye chand-roza bahāreñ sadā-bahār nahīñ

ki Dhaltī chhāñv kā ai dost e'tibār nahīñ

badalte rahte haiñ ye rang āsmāñ kī tarah

nazar-farosh sahāroñ kā e'tibār nahīñ

tirī nigāh ke sadqe maiñ ab vahāñ huuñ jahāñ

koī rafīq nahīñ koī ġham-gusār nahīñ

chaman meñ rāz-e-chaman ban gayā hai jo hamdam

vahī to bulbul-e-marhūm kā mazār nahīñ

na chhīn shām-e-junūñ mujh se āsmāñ ki mujhe

havā-e-sub.h-e-chaman ab ke sāzgār nahīñ

isī se pūchho mirī ham-safar hai ye bijlī

mire junūñ ko zamāne kā intizār nahīñ

vo ġham-nasīb kahāñ jaa.e kis ko apnā.e

tirī nigāh-e-karam jis kī ġham-gusār nahīñ

dil-e-hazin ko na malum kyun qarar nahin

nigah-e-shauq to paband-e-e'tibar nahin

ye chand-roza bahaaren sada-bahaar nahin

ki Dhalti chhanw ka ai dost e'tibar nahin

badalte rahte hain ye rang aasman ki tarah

nazar-farosh sahaaron ka e'tibar nahin

teri nigah ke sadqe main ab wahan hun jahan

koi rafiq nahin koi gham-gusar nahin

chaman mein raaz-e-chaman ban gaya hai jo hamdam

wahi to bulbul-e-marhum ka mazar nahin

na chhin sham-e-junun mujh se aasman ki mujhe

hawa-e-subh-e-chaman ab ke sazgar nahin

isi se puchho meri ham-safar hai ye bijli

mere junun ko zamane ka intizar nahin

wo gham-nasib kahan jae kis ko apnae

teri nigah-e-karam jis ki gham-gusar nahin