dil-e-iza-talab le tera kahna kar liya maine

dil-e-īzā-talab le terā kahnā kar liyā maiñ ne

kisī ke hijr meñ jiinā gavārā kar liyā maiñ ne

but-e-paimāñ-shikan se intiqāman hī sahī lekin

sitam hai vāda-e-tark-e-tamannā kar liyā maiñ ne

niyāz-e-ishq ko sūrat na jab koī nazar aa.ī

junūn-e-bandagī meñ ḳhud ko sajda kar liyā maiñ ne

vafā-nā-āshnā is sādgī kī daad de mujh ko

samajh kar terī bātoñ par bharosā kar liyā maiñ ne

mohabbat be-bahā shai hai magar taqdīr achchhī thī

matā-e-do-jahāñ de kar ye saudā kar liyā maiñ ne

milā to diid kā mauqa magar ġhairat ko kyā kahiye

jab aa.ī vādī-e-aiman to parda kar liyā maiñ ne

baḌī daulat hai haq ke naam par daulat luTā denā

jahāñ meñ phūñk kar chāñdī ko sonā kar liyā maiñ ne

kisī ke ek dard-e-bandagī se kyā milī fursat

ki dil meñ sau tarah kā dard paidā kar liyā maiñ ne

tamāshā dekhte hī dekhte un kī adāoñ kā

sar-e-mahfil ḳhud apne ko tamāshā kar liyā maiñ ne

kisī kī raah meñ 'fārūq' barbād-e-vafā ho kar

burā kyā hai ki apne haq meñ achchhā kar liyā maiñ ne

dil-e-iza-talab le tera kahna kar liya main ne

kisi ke hijr mein jina gawara kar liya main ne

but-e-paiman-shikan se intiqaman hi sahi lekin

sitam hai wada-e-tark-e-tamanna kar liya main ne

niyaz-e-ishq ko surat na jab koi nazar aai

junun-e-bandagi mein KHud ko sajda kar liya main ne

wafa-na-ashna is sadgi ki dad de mujh ko

samajh kar teri baaton par bharosa kar liya main ne

mohabbat be-baha shai hai magar taqdir achchhi thi

mata-e-do-jahan de kar ye sauda kar liya main ne

mila to did ka mauqa magar ghairat ko kya kahiye

jab aai wadi-e-aiman to parda kar liya main ne

baDi daulat hai haq ke nam par daulat luTa dena

jahan mein phunk kar chandi ko sona kar liya main ne

kisi ke ek dard-e-bandagi se kya mili fursat

ki dil mein sau tarah ka dard paida kar liya main ne

tamasha dekhte hi dekhte un ki adaon ka

sar-e-mahfil KHud apne ko tamasha kar liya main ne

kisi ki rah mein 'faruq' barbaad-e-wafa ho kar

bura kya hai ki apne haq mein achchha kar liya main ne