dil-e-KHarab ke ahkaam Thik lagne lage

dil-e-ḳharāb ke ahkām Thiik lagne lage

liye jo faisle nākām Thiik lagne lage

mirā shumār unhī sar-phiroñ meñ hotā hai

jinheñ udāsī sar-e-shām Thiik lagne lage

samā'atoñ ko ḳhamoshī kī vo aziyyat do

ki ird-gird kā kohrām Thiik lagne lage

hamārī ḳhaak pe kūza-garoñ ne mehnat kī

to tab ye farq paḌā daam Thiik lagne lage

chalūñ to dil kahe ruk jaa.e ghūmtī duniyā

rukūñ to gardish-e-ayyām Thiik lagne lage

hamārī TūTne ke baa'd aisī hālat hai

ki ghar ke ḳhasta dar-o-bām Thiik lagne lage

kabhī lage nahīñ mujh se burā sulūk huā

kabhī kahānī kā anjām Thiik lagne lage

ġhalat ko itne tasalsul se Thiik kahte raho

ki jo ġhalat ho vahī kaam Thiik lagne lage

dil-e-KHarab ke ahkaam Thik lagne lage

liye jo faisle nakaam Thik lagne lage

mera shumar unhi sar-phiron mein hota hai

jinhen udasi sar-e-sham Thik lagne lage

sama'aton ko KHamoshi ki wo aziyyat do

ki ird-gird ka kohram Thik lagne lage

hamari KHak pe kuza-garon ne mehnat ki

to tab ye farq paDa dam Thik lagne lage

chalun to dil kahe ruk jae ghumti duniya

rukun to gardish-e-ayyam Thik lagne lage

hamari TuTne ke ba'd aisi haalat hai

ki ghar ke KHasta dar-o-baam Thik lagne lage

kabhi lage nahin mujh se bura suluk hua

kabhi kahani ka anjam Thik lagne lage

ghalat ko itne tasalsul se Thik kahte raho

ki jo ghalat ho wahi kaam Thik lagne lage