دل خراب سے یہ کیسا انتخاب ہوا

دل خراب سے یہ کیسا انتخاب ہوا

کہ جاں گسل یہ ترے عشق کا عذاب ہوا

کھڑے کھڑے تو اسے ہم کھری سنائیں گے

ہمارا روز قیامت اگر حساب ہوا

بکھر گئی مرے آنگن میں چاندنی اس کی

وہ مہ جبیں مری بانہوں میں محو خواب ہوا

ہزار حیف وہی راہزن کا ساتھی تھا

مرے وطن کا محافظ بھی بے نقاب ہوا

کسر روا نہ رکھی گلستاں اجاڑنے میں

کسی سے کم نہ تھے جب اپنا احتساب ہوا

ہے منفرد ترا معیار فکر و فن جوگیؔ

تری غزل کا ہر اک شعر لاجواب ہوا