dil-e-KHarab se ye kaisa intiKHab hua

dil-e-ḳharāb se ye kaisā intiḳhāb huā

ki jāñ-gusil ye tire 'ishq kā 'azāb huā

khaḌe khaḌe to use ham kharī sunā.eñge

hamārā roz-e-qayāmat agar hisāb huā

bikhar ga.ī mire āñgan meñ chāñdnī us kī

vo mah-jabīñ mirī bāñhoñ meñ mahv-e-ḳhvāb huā

hazār-haif vahī rāhzan kā sāthī thā

mire vatan kā muhāfiz bhī be-naqāb huā

kasar ravā na rakhī gulsitāñ ujāḌne meñ

kisī se kam na the jab apnā ehtisāb huā

hai munfarid tirā me'yār-e-fikr-o-fan 'jogī'

tirī ġhazal kā har ik she'r lā-javāb huā

dil-e-KHarab se ye kaisa intiKHab hua

ki jaan-gusil ye tere 'ishq ka 'azab hua

khaDe khaDe to use hum khari sunaenge

hamara roz-e-qayamat agar hisab hua

bikhar gai mere aangan mein chandni us ki

wo mah-jabin meri banhon mein mahw-e-KHwab hua

hazar-haif wahi rahzan ka sathi tha

mere watan ka muhafiz bhi be-naqab hua

kasar rawa na rakhi gulsitan ujaDne mein

kisi se kam na the jab apna ehtisab hua

hai munfarid tera me'yar-e-fikr-o-fan 'jogi'

teri ghazal ka har ek she'r la-jawab hua