dil-e-KHud-ashna sohan-e-zindagi hoga

dil-e-ḳhud-āshnā sohān-e-zindagī hogā

ye sañg-e-mīl hai kal sañg-e-rāh bhī hogā

har ek moḌ pe pīchhe palaT ke dekhtā huuñ

vo gard-e-rah sahī hamrāh to koī hogā

hameñ hamārī vafā dasht dasht DhūñDegī

tumhāre husn kā charchā galī galī hogā

vo maiñ nahīñ mirī āshuftagī-e-dil hogī

vo tū nahīñ tirā andāz-e-dilbarī hogā

bahār-e-jalva-e-gul to nazar meñ thī kal bhī

tahī thā dast-e-talab aaj bhī tahī hogā

sunā hai vaqt kabhī ek sā nahīñ rahtā

qayām fasl-e-ḳhizāñ kā bhī aarzī hogā

tumhārī shab hai ziyā-bār māh-o-anjum se

hamārī sub.h kā manzar bhī dīdanī hogā

ye rañg-e-bazm ghaḌī do ghaḌī hai phir 'ḳhāvar'

kahīñ pe hogā koī aur kahīñ koī hogā

dil-e-KHud-ashna sohan-e-zindagi hoga

ye sang-e-mil hai kal sang-e-rah bhi hoga

har ek moD pe pichhe palaT ke dekhta hun

wo gard-e-rah sahi hamrah to koi hoga

hamein hamari wafa dasht dasht DhunDegi

tumhaare husn ka charcha gali gali hoga

wo main nahin meri aashuftagi-e-dil hogi

wo tu nahin tera andaz-e-dilbari hoga

bahaar-e-jalwa-e-gul to nazar mein thi kal bhi

tahi tha dast-e-talab aaj bhi tahi hoga

suna hai waqt kabhi ek sa nahin rahta

qayam fasl-e-KHizan ka bhi aarzi hoga

tumhaari shab hai ziya-bar mah-o-anjum se

hamari subh ka manzar bhi didani hoga

ye rang-e-bazm ghaDi do ghaDi hai phir 'KHawar'

kahin pe hoga koi aur kahin koi hoga