dil-e-KHulus-gazida ko koi kya jaane

dil-e-ḳhulūs-gazīda ko koī kyā jaane

maiñ chāhtā huuñ ki duniyā mujhe na pahchāne

suno na merī shikasta-e-dilī ke afsāne

ki mere sāmne toḌe ga.e haiñ paimāne

jo kah rahā thā to kuchh bhī sunā na duniyā ne

jo chup huā huuñ to banñe lage haiñ afsāne

vo ġham sameT liye maiñ ne zindagī ke liye

tirī nigāh-e-karam bhī jinheñ na pahchāne

guzar ga.e haiñ vo lamhe bhī ishq meñ ai dost

tire baġhair bhī jab ḳhush rahe haiñ dīvāne

ye chāñdnī ye sitāre kahāñ ga.e āḳhir

nazar to ḳhair ga.ī hai kisī ko pahuñchāne

mirī hañsī meñ magar zahr ghul gayā 'nāzish'

maiñ chāhtā thā mirā ġham koī na pahchāne

dil-e-KHulus-gazida ko koi kya jaane

main chahta hun ki duniya mujhe na pahchane

suno na meri shikasta-e-dili ke afsane

ki mere samne toDe gae hain paimane

jo kah raha tha to kuchh bhi suna na duniya ne

jo chup hua hun to banne lage hain afsane

wo gham sameT liye main ne zindagi ke liye

teri nigah-e-karam bhi jinhen na pahchane

guzar gae hain wo lamhe bhi ishq mein ai dost

tere baghair bhi jab KHush rahe hain diwane

ye chandni ye sitare kahan gae aaKHir

nazar to KHair gai hai kisi ko pahunchane

meri hansi mein magar zahr ghul gaya 'nazish'

main chahta tha mera gham koi na pahchane