dil-e-mard-e-musalman mein kisi but ka qadam aaya

dil-e-mard-e-musalmāñ meñ kisī but kā qadam aayā

mirī duniyā meñ tum aa.e ki patthar kā sanam aayā

pa.e-nazr-e-aqīdat le ke jān-o-dil kā nazrāna

sanam-ḳhāne ke dar par ik parastār-e-haram aayā

uThāo jām-o-sāġhar mai-kasho kaalī ghaTā chhā.ī

manāo jashn-e-sahbā ghir ke phir abr-e-karam aayā

karā do ġhusl-e-mai ai bāda-ḳhvāro shaiḳh sāhab ko

bharī mahfil meñ maiḳhāne kī shaiḳh-e-mohtaram aayā

dikhā ke jaam chhalkāte haiñ mai-kash aaj vaa.iz ko

huī saaqī kī jab chashm-e-karam rindoñ meñ dam aayā

vahīñ se chal diyā 'shā.eq' maiñ fauran sū-e-mai-ḳhāna

mire aage jahāñ bhī qissa-e-dair-o-haram aayā

dil-e-mard-e-musalman mein kisi but ka qadam aaya

meri duniya mein tum aae ki patthar ka sanam aaya

pae-nazr-e-aqidat le ke jaan-o-dil ka nazrana

sanam-KHane ke dar par ek parastar-e-haram aaya

uThao jam-o-saghar mai-kasho kali ghaTa chhai

manao jashn-e-sahba ghir ke phir abr-e-karam aaya

kara do ghusl-e-mai ai baada-KHwaro shaiKH sahab ko

bhari mahfil mein maiKHane ki shaiKH-e-mohtaram aaya

dikha ke jam chhalkate hain mai-kash aaj waiz ko

hui saqi ki jab chashm-e-karam rindon mein dam aaya

wahin se chal diya 'shaeq' main fauran su-e-mai-KHana

mere aage jahan bhi qissa-e-dair-o-haram aaya