dil-e-muztar mujhe ek baat bata sakta hai

dil-e-muztar mujhe ik baat batā saktā hai

tū kisī taur mujhe chhoḌ ke jā saktā hai

ye tirī bhuul hai maiñ tere sabab zinda huuñ

mujh sā ziddī to badan toḌ ke jā saktā hai

jis ne is ḳhaak ke insān ko izzat dī hai

vahī is ḳhaak ko miTTī meñ milā saktā hai

to mire saath to hai phir bhī mire saath nahīñ

is se baḌh kar bhī mujhe koī satā saktā hai

mire maulā mirī tanhā.ī miTāne ke liye

mere jaisā hī tū ik aur banā saktā hai

mujhe ma.alūm hai milnā nahīñ mumkin lekin

tū kisī raat mire ḳhvāb meñ aa saktā hai

mirī ulfat kā sar-e-bazm tamāsha kar ke

aap apne ko tū itnā bhī girā saktā hai

zaḳhm-e-ulfat se navāzā tū mirā mohsin hai

tū mirī zaat pe ehsān jatā saktā hai

apne dilbar ke bulāve pe bahāne kaise

vo to mahbūb hai jab chāhe bulā saktā hai

vo jo rote ko hañsāne kā hunar rakhte haiñ

gar vo ro.eñ to unheñ kaun hañsā saktā hai

apnī marzī se mujhe chhoḌ ke jaane vaalā

mirī yādoñ ko kabhī dil se miTā saktā hai

mujh ko jiine se mohabbat na mohabbat kī havas

merī tarah koī jazboñ ko sulā saktā hai

siyah-baḳhtī meñ tirī zaat bhī shāmil hai 'alī'

tū kisī taur use duur haTā saktā hai

dil-e-muztar mujhe ek baat bata sakta hai

tu kisi taur mujhe chhoD ke ja sakta hai

ye teri bhul hai main tere sabab zinda hun

mujh sa ziddi to badan toD ke ja sakta hai

jis ne is KHak ke insan ko izzat di hai

wahi is KHak ko miTTi mein mila sakta hai

to mere sath to hai phir bhi mere sath nahin

is se baDh kar bhi mujhe koi sata sakta hai

mere maula meri tanhai miTane ke liye

mere jaisa hi tu ek aur bana sakta hai

mujhe malum hai milna nahin mumkin lekin

tu kisi raat mere KHwab mein aa sakta hai

meri ulfat ka sar-e-bazm tamasha kar ke

aap apne ko tu itna bhi gira sakta hai

zaKHm-e-ulfat se nawaza tu mera mohsin hai

tu meri zat pe ehsan jata sakta hai

apne dilbar ke bulawe pe bahane kaise

wo to mahbub hai jab chahe bula sakta hai

wo jo rote ko hansane ka hunar rakhte hain

gar wo roen to unhen kaun hansa sakta hai

apni marzi se mujhe chhoD ke jaane wala

meri yaadon ko kabhi dil se miTa sakta hai

mujh ko jine se mohabbat na mohabbat ki hawas

meri tarah koi jazbon ko sula sakta hai

siyah-baKHti mein teri zat bhi shamil hai 'ali'

tu kisi taur use dur haTa sakta hai