dil-e-muztar se ulfat ki farawani nahin jati

dil-e-muztar se ulfat kī farāvānī nahīñ jaatī

nahīñ jaatī hai ya.anī ḳhū-e-insānī nahīñ jaatī

ye kyā dastūr kyā ā.īn-e-mai-ḳhāna hai ai saaqī

ki rindoñ kī yahāñ to baat bhī maanī nahīñ jaatī

mujhe ai shaiḳh kuchh muddat tū but-ḳhāne meñ rahne de

butoñ meñ baiTh kar dil se musalmānī nahīñ jaatī

shanāsā the sabhī apne ki jab tak baḳht yāvar thā

paḌī mushkil to ab sūrat bhī pahchānī nahīñ jaatī

ye kyā kahte ho ham un ko kahāñ DhūñDeñ kidhar DhūñDeñ

talāsh-e-yār meñ kyā ḳhaak bhī chhānī nahīñ jaatī

agar gul ko chaman se toḌ pheñkeñ ḳhār-zāroñ meñ

to phir bhī us kī vo bū-e-gulistānī nahīñ jaatī

kisī majbūr fitrat se gila kyūñ-kar kare koī

ki mār-e-āstīñ se zahr-afshānī nahīñ jaatī

bhulā kar bhī vo fann-e-shā.irī kī pur-kaThin rāheñ

'nashāt' apnī tabī.at kī ye jaulānī nahīñ jaatī

dil-e-muztar se ulfat ki farawani nahin jati

nahin jati hai yani KHu-e-insani nahin jati

ye kya dastur kya aain-e-mai-KHana hai ai saqi

ki rindon ki yahan to baat bhi mani nahin jati

mujhe ai shaiKH kuchh muddat tu but-KHane mein rahne de

buton mein baiTh kar dil se musalmani nahin jati

shanasa the sabhi apne ki jab tak baKHt yawar tha

paDi mushkil to ab surat bhi pahchani nahin jati

ye kya kahte ho hum un ko kahan DhunDen kidhar DhunDen

talash-e-yar mein kya KHak bhi chhani nahin jati

agar gul ko chaman se toD phenken KHar-zaron mein

to phir bhi us ki wo bu-e-gulistani nahin jati

kisi majbur fitrat se gila kyun-kar kare koi

ki mar-e-astin se zahr-afshani nahin jati

bhula kar bhi wo fann-e-shairi ki pur-kaThin rahen

'nashat' apni tabiat ki ye jaulani nahin jati