dil-e-muztar teri furqat mein bahlaya nahin jata

dil-e-muztar tirī furqat meñ bahlāyā nahīñ jaatā

kisī pahlū se ye nādān samjhāyā nahīñ jaatā

namak-pāshī mire zaḳhmoñ pe ye kah kah ke karte haiñ

zarā sī baat meñ yuuñ ashk bhar laayā nahīñ jaatā

Darātā kyuuñ hai ai nāseh mohabbat kī kashākash se

phañsā kar dil ko is kūche se katrāyā nahīñ jaatā

mirī zulfeñ haTā kar ruḳh se vo kahte haiñ hañs hañs kar

añdherī raat hai aise meñ sharmāyā nahīñ jaatā

ġham-o-ālām ne is darja ham ko kar diyā ghāyal

ḳhud apnī dāstāñ ko ham se dohrāyā nahīñ jaatā

baḌī is bekasī kī manzileñ pur-haul hotī haiñ

kisī se jab koī 'tasnīm' apnāyā nahīñ jaatā

dil-e-muztar teri furqat mein bahlaya nahin jata

kisi pahlu se ye nadan samjhaya nahin jata

namak-pashi mere zaKHmon pe ye kah kah ke karte hain

zara si baat mein yun ashk bhar laya nahin jata

Daraata kyun hai ai naseh mohabbat ki kashakash se

phansa kar dil ko is kuche se katraya nahin jata

meri zulfen haTa kar ruKH se wo kahte hain hans hans kar

andheri raat hai aise mein sharmaya nahin jata

gham-o-alam ne is darja hum ko kar diya ghayal

KHud apni dastan ko hum se dohraya nahin jata

baDi is bekasi ki manzilen pur-haul hoti hain

kisi se jab koi 'tasnim' apnaya nahin jata